Rev 9 | ASO | STEP | Ido' ne'mine ogavo angelo' naba faef ne'mo nene pikuli've hubu lo do nolo molavo ninguvoni' nene okulumokuti' sonohi' ma misubolo' do'moze minine' nene ninguve. A'mine sonohi' neve nene hemuvosi nomine' galese ha'nali'mi veleloti' kii've nene imikevo do minine' ve.

Revelation of John 9

Angelo' Naba Faef Ne'mo Pikuli Hubu Lavo Soto' Ine' Initekumu' Zohane' Gizine' Gamazi

1 Ido' ne'mine ogavo angelo' naba faef ne'mo nene pikuli've hubu lo do nolo molavo ninguvoni' nene okulumokuti' sonohi' ma misubolo' do'moze minine' nene ninguve. A'mine sonohi' neve nene hemuvosi nomine' galese ha'nali'mi veleloti' kii've nene imikevo do minine' ve. 2 Ido' a'mine kii' nedunu' nene a'mine galese'mi akahe've nene si'zo godavo a'minguti' nene sokile vai' goloso hosoni vite' ikevo sokile dizaa' ine' ne'mino dizo okulumotokisi ido' ho' velelokisi molo hito do liti'muso izine' ve. 3 Ido' a'mine sokileuti' nene ma'nabuso gili vani' inite' nene misubou' limikevo misubouko nizani' gazehe ga'muko' ne'mineti amuzo'ine ne'mine nene O'moso'mo ngimine' ve. 4 Ne'mine ogo ti' lo lo-ngidine' ve: Lingine nene guvise navise nehe za' nala' nehe nevo'mine inite' nene di goloso i-ngidami asi O'moso'mi noso golihi'nido' milamani' alevevo' nene di goloso i-ngidilo. 5 Ne'mine lo a'mine ngimine' amuzo nene a'mine aleve ngibili hililizani' amuzo ngimine' nevoba asi ike'ni faef ne'mi lulou' ngibili'mi vi nizavo mulumo ekese' goloso gili minilizangumu' ve losa amuzo ngimine' ve. Ido' a'mine mulumo gili minilizani' nene gazehe ga'mukolite evene' ngibilikevo mulumo ekese' goloso gilaa' nani' ne'minisa nene gili minilisave. 6 Ne'mine igi mulumo ekese' gili minilizani' gameneu' nene evene' nete helaa' akamu' vise' ilisaha mo ma ningamilisave. Ee, mo helelobo li gili minilisaha helaa' ne'mo nene olovo' o-ngedeleseive.

7 Ido' a'mine ma'nabuso gili vani' inite' nene hosi gili minani' ve. Ado' lovou' di vilisa di nene i-ngidikevo minani' hosi gili minani' ve. Ido' a'mine ma'nabuso gili vani' initeliti godo'nido' nene kuvanadi angili' ngolidunu' lili' ani' gele vine' nene gihi minani' ve. Ido' go'ine ve'ine nene evene' gote vete ne'minesi minani' ve. 8 Ido' madu'ine zopovo nene ha'na ha'na venelitine ne'minosa minine' ve. Ido' ve'ine gavulo nene laioni gulo neti ve'ine gavulo gasava ne'minosa minine' ve. 9 Ido' loso'nido' lepese ne'mine izikani' nene ainidunu' lili' ani' gele vine' izikani' ve. Ido' a'mine inite' pateli nivavo holoke'ne'ninguti' nolo molani' nene hosi vailite lovou' kali ma gelelehe' igi loti' izi di nivavo gilili ngilili lo minaa' neine' ne'minosa minine' ve. 10 Ido' gazehesi ido' gazehe ne'mini minani' inite' masi ingine avasuvo'ningu' nene evene' ngibilaa' ani' inite'inesi minaa' naani' ne'mini a'mine ma'nabuso gili vani' inite' nene avasuvo'ningu' evene' ngibilaa' ani' inite'inesi minani' ve. Ido' ne'mini minani' nenako nemu' nene a'mine ike'ni faef neu' evene' di goloso i-ngidi minilizani' amuzo'ine nene a'mine avasuvo'ningu' nene minine' ve. 11 Ido' engi' guve'inesi ve nene a'mine hemuvosi nomine' galese ha'na ha'nalo' gizebo oga' neine' angelo' neve nene engi' guve'inesi ve minine' ve. A'mine angeloli'mi gulive nene Zuda veti gamazi'ninguti' nene Abadoni' ve li laa' nave. Ido' nGiliki veti gamazi'ninguti' nene Apolioni' ve li laa' nave. A'mine gulive setalitisi monovo nene inite' do goloso oga' ive ve.

12 Agae, mulumo geni inite' naba hamo' ma nene mo vaaha mulumo geni naba lumo seta' nene mo olihe soto' ilisa nasive.

Angelo' Naba Sigisi Ne'mo Pikuli Hubu Lavo Soto' Ine' Initekumu' Zohane' Gizine' Gamazi

13 Ido' neloti' nene angelo' naba sigisi ne'mo nene pikuli've hubu lo do nolo molavo ngolidunu' lili' ani' alata O'moso'mi velela minine' ne'mi gatu'muvo seta've seta'vela komu minanguti' nene nolo hamo' ma soto' ogosa 14 a'mine pikuli di minani' angelokuti' naba sigisi mamu' nene ti' lo nolo-divo giluve: Noso naba Zupalati nela angelo' seta've seta've nala' izi-ngidikani' ma nene vo vakese-ngedezo. 15 Ne'mine lavo vo a'mine angelo' seta've seta've ado' O'moso'mo a'mine gamenemu' gehepeve do va'va' o-ngedavo minani' ma nene vo apase-ngidine' ve. Ne'mine lavo vo apase-ngidine' nene evene' laka'ni seto hamo minanguti' lingela hamo' nene ngibili hililizave lo O'moso'mo ne'mine i-ngidilizani' gamene'mi kilisimasi'vesi ido' ike'ni'vesi ido' holise' gamene'vesi ido' aua'vesi nene gamene molo hulo-ngedekivosa ha minani' nene vakese-ngidine' ve. 16 Ido' a'mine angelo' fo'a neti gizebo'nido' mini hosilo' monaa' ani' ami nene tuu hadeti milioni (200,000,000) ne'mine nene minani' ve. Ido' a'mine tuu hadeti milioni ne'mine minave noluvoni' nene mo naba'ine li-nimikevo mo gelosa nene noluve. 17 Ido' a'mine hosilo' minani' amisi hosi'inesi ve'nelo' i milangu' nene ne'minisa nizavoo ninguve: Loso'nido' lepese nene olo' gulumo ne'mine gulehe' ilinekisi ido' sahila geheni gumi kala ne'minesi ido' salfa geheni ne'mine gihungo' ilinekisi nene izikani' ve. Ido' hosi'ineti madu'ine nene laioni guloliti madu'ine gele vine' nizavo ve'ninguti' nene olo' gulumosi sokilesi salfa gehenisi nene leme heta ogo minine' ve. 18 A'mine evene' di goloso i-ngidaa' ani' inite' seto hamo ado' a'mine hosiliti ve'ninguti' leme minine' inite' olo' gulumosi sokilesi ido' salfa geheni nesi nete nene evene' seto hamo seto hamo minanguti' hamo hamo' nene ngibili hilani' ve. 19 Ee, a'mine hosiliti amuzo'ine nene ve'ningukisi avasuvo'ningukisi minine' ve. Avasuvo'nine nene gosihe' ne'mine madu'inesi minikevo a'mine avasuvo'inedunu' nene evene' di goloso i-ngidaa' ani' ve.

20 Ne neiha a'mine evene' di goloso i-ngidaa' ani' initelite ngibili hilamavo evene' lumo ha minave nete nene lu'ine di velepe' izisa igi mili iga' ani' monovo nene hulilizanako hulamave. Ado' ve'ine ningisa'mani' ido' ga'ine gilisa'mani' inite' ido' aka monamilizado' i nizani' inite' soza o'moso ado' ngolidunu' nehe siluva' gehenidunu' nehe ido' ngoli gele vine' inite' gohi madunu' nehe ido' gehenidunu' nehe ido' zadunu' nehe nevo'mine initetunu' engi' a'inedunu' gono di lili' ani' inite' nene ngopo'ni li minaa' ido' sikalahu' goloso ngopo'ni li minaa' ani' nene hulamani' ve. 21 Ido' lu'ine di velepe' izi engi' monovo'ine goloso linge ado' evene' ngibili hilaa' ani' monovo'inesi ido' poisini gamazi'inesi ido' vene' vemoho' alu gipe gopo ingaa' ani' monovo'inesi ido' gumine damine iga' ani' monovo'inesi nene mo hulamani' ve.